KEF 2005 Literaturo

En KEF eblos konatiĝi kun multaj facetoj de esperanta literaturo: noveloj, romanoj, poemoj, recenzoj, komiksa literaturo, muzika liriko. En aŭtoraj horoj ni povas konatiĝi kun la verkistoj kaj siaj verkoj, en diversaj kursoj ni provos la verkadon mem. Laŭe al la KEFa titolo ”Korpo kaj kulturo”, ni kompreneble parolos abunde pri beletraj korpoj: erotika poezio, viroj, virinoj, amoj, mamoj ks. estos nia literatura ĉeftemo.

Jorge Camacho

Kio estus KEF sen la hispana verkisto, Jorge Camacho, kiu estas momente unu el la plej elstaraj esperantaj verkistoj. Li verkis poemojn, novelojn, eseojn kaj recenzojn ekde 1989 kaj gajnis faskon da premioj en la Belartaj Konkursoj de UEA plurfoje. En 2004 aperis du poemaroj liaj: Celakantoj kaj Saturno. Pri Celakantoj skribas Mauro Nervi sekve:

La poemaro de Jorge Camacho, kies voĉon vi spertas ĉi-libre en silenta legado, pintas mejloŝtone en la realisma tradicio de la esperanta literaturo: la duan fojon, post William Auld, ni renkontas esperantan poeton kies instinkta inspiro estas ne umbilikismaj rememoroj aŭ cerbostreĉaj lirikaĵoj, sed vivo en sia konkreto --sango kaj polvo, bataloj, ideologio, vojaĝoj, homaj interrilatoj." (el la postparolo de Mauro NERVI)"

Por finnoj Jorge estas aparte interesa verkisto. Li ne nur vivis en Finnujo plurfoje, sed verkis ankaŭ serion da poemoj dediĉitaj al Finnujo. Fakte, li eĉ verkis sian unuan esperantan poemon iam ajn en Finnujo.

En KEF Jorge prezentos ne nur siajn verkojn, sed prelegos ankaŭ pri diversaj temoj. Kiel preleganto Jorge ne sukcesus enuigi sian publikon eĉ se li forte provus kaj intencus.

Sten Johansson

Sten Johansson estas sveda verkisto kaj tradukisto tre produktiva, kiu jam de 1986 verkas novelojn, poemojn, krimromanojn, eseojn, eĉ teatraĵojn originale en esperanto kaj estis premiita en la Belartaj Konkursoj plurjare, plurbranĉe. Li ankaŭ tradukis en esperanton plurajn svedajn verkistojn. Ŝuldiĝas al Sten, ke ni povos legi i.a pri Nils Holgersson esperante.

Pri Sten skribas Gerrit Berveling en du aprataj recenzoj en Fonto sekve:

Sten verkas lingve tre lerte, klare, sen superflue balastaj novaĵoj, sed ja en suke viveca stilo, kun bele dozitaj trafaj esprimoj.

Sten ĉiufoje vekas tiel realecan etoson en siaj romanetoj, ke oni emas eklegi pli da... Sed mi devas konfesi, ke legante krimromanojn, aŭ spektante tiajn filmojn - precipe se estas seriaj liveraĵoj -, mi foje malagrable kaptiĝas de la dubo (kaj ĝuste tia dubo estas mortiga por ĝusta aprezo de la ĝenro, mi timas), ĉu vere en ’tiu’ urbeto okazas tiom da teruraj krimoj? aŭ ĉu vere ĉiufoje kiam certa aktor(in)o surscenejiĝas iuregione, ĉu vere tuj okazu tie iu murdo? Pensu pri Jessica Fletcher, Der Alte, Derrick, Maigret k.a....

I.a pri ĉi lasta temo, krimromanoj kaj kiom da krimoj povos, do, okazi unuurbe, ni parolos kun Sten en KEF. Kaj pri multaj aliaj temoj. En la aŭtora horo Sten prezentos siajn verkojn propravoĉe.

Anja Karkiainen

Anja Karkiainen, finna verkistino, famiĝis en Esperantujo tra originalaj poemoj kaj kantoj kaj premiiĝis jam plurfoje, ambaŭbranĉe en la Belartaj Konkursoj. Plejlaste ŝi gajnis la unuan kaj duan premion en la branĉo poezio en 2003. Ŝi eĉ verkas en por Esperantujo malpli ofta kampo, infankantoj, kaj tradukas kantotekstojn esperanten.

En KEF ni aŭdos kaj poemojn kaj kantojn de Anja, parte de Anja mem, parte ilin prezentos kantistino Liisa Viinanen. La operliriko de la kefa opervespero estas ankaŭ el la plumo de Anja.


Probal Daŝgupta

Probal Daŝgupta (n. 1953) estas profesoro pri aplika lingvistiko en la universitato de Hajderabado, Hindio, kaj verkisto de multaj internacie konataj publikaĵoj en sia esplorfako. Al KEF 2005 li venos kiel verkisto de originala esperanta literaturo kaj tradukisto de originale bengallingvaj verkoj. Li estas rekonata kiel unu el la plej rimarkindaj eseistoj en Esperantio pro la elstarantaj formo, lingvo kaj ideoj de siaj tekstoj.

En KEF 2005 Probal Daŝgupta ne nur prelegos sed gvidos skribatelieron por la partoprenantoj kunlabore kun Jorge Camacho kaj Sten Johansson. Li volas ankaŭ kontribui la infanan programon per bengalaj fabeloj. Daŝgupta neniam antaŭe vizitis Finnlandon sed bone konas verkojn de Vilho Setälä kaj havas esperantistajn amikojn ĉi tie.

Arnau Torras

Komiksforman literaturon reprezentas en KEF nia plej konata, fola, kataluna komiksartisto kaj artisto Arnau Torras. Se jam la temo estas ”Korpo kaj kulturo”, kies nomo el ĉiuj esperantaj artistoj fakte unue venus viamensen: Arnau! Nepre! En liaj tre korporilataj komiksoj, kiuj efike sukcesas ŝoki kelkajn deculojn eĉ ankoraŭ, temas ofte pri esperanta kulturo: la aŭtoro agrable uzas alludojn al ĝisoste espaj fenomenoj, beletraĵoj, verkistoj ks. En 2004 aperis du novaj komiksalbumoj de Arnau: Malpli da teksto, pli da sekso kaj La vivo simplas, temas pri amo. Interese, ke en certa recenzo de Donald Broadribb en Monato, la komiksojn oni laŭdas pro uzado de kondomoj kaj kondamnas pro ”malalta porna kvalito”. Hmm…? En KEF ni certe parolos kun Arnau kaj aliaj ne nur pri sekso, porno kaj amo, sed ankaŭ pri recenzarto kaj pri komiksa literaturo.

Duplustro

En KEF sperteblos ankaŭ ekspozicio de finna bildstria artisto, Duplustro, kies bildstrioj regule aperas en la finna revuo Esperantolehti. Duplustro per siaj kurtaj bildaj rakontoj trafe prezentas personojn, etosojn, okazintaĵojn verajn kaj supozatajn de la finna esperantomovado, speciale de la junulara movado.

* * * * *